Silveira, hurrengoan behar bada

Herenegun “Erdal herrian euskaraz” Silveiraren artikulua irakurtzeari ekin nion. Ez gogotsu, ondo baitakit zelangoak botatzen dituen gure bertsolari nafarrak. Lehenengo lerrotik harritu ninduen, ordea. Gaia, ona: gure gazteek ez dute euskararik erabiltzen hirietan, eta herri txiki askotako gazteei kosta egiten zaie gaztelaniaz patxadaz jardutea.

Dena ere artikulu-azalpen normal eta txukun batetan; hainbestean ezen, ona zelakotz, atzo Berrian ere jaso ziotela idatzia. Dena hain ondo zihoan, hain bat nentorren berarekin, baita “zergatik ez du EAJk plan eraginkor bat sortzen?” galdetzen zuenean ere, onartuko ere egingo niokeela bere buruari ematen zion erantzunaren lehen zatia:
"Ez zaiolako interesatzen". Bai, onartzen dut, alderdikide modura, erantzun horrek zati handia duela egitik. Ez osoa, baina. Luze jardun gaitezke euskararen erabileraz kalean, ikastolan, bikoteetan eta etxeetan. Azterketa orokorra egingo bagenu, Silveira, gerta liteke emaitzak txundituta geratzea, ohartuko baizinake hutsuneak berdin antzean daudela banatuta zuk neurri gabean goreste duzun ENAMen eta jeltzaleeen munduan. Halaz guztiz, ez dut eragozpenik onartzeko jeltzaleen epelkeria eta jarrera kontraesankorra euskararekiko larria dela. Ondo ezagutzen dut, zuk baino askoz hobeto, EAJren mundua, eta aitortzen dut diskurtso itzela duela eta praktika eskasa. Ezin uka gure alderdikideak bihotzez euskaldunak direla larrean eta hitzez erldaldunak gehienetan. Zuek bezala, Silveira. Edo akaso esan nahi didazu zuek euskararekiko atxikimendu azkengabea erakusten duzela Donostin, Bilbon, Iruñan, Gasteizen edo Baionan, alegia, ziudadanun gotorlekuetan?

Artikuluaren amaiera, Silveira, No jodas! Ezin zenion, hurrean, zentzunari eutsi, Silveria, ze justu akabaeran, goraka-gurearen gogo larriarekin-edo, derrigor bota behar izan duzu: "EAJ española delako". Hain zindoazen serio argumentazio guztian, sinetsita ere banegoela azken garai honetan zerbaitek edo norbaitek ustekabean eragin dizula. Ba ez, oker nengoen. Zure betiko itsukeria, zure txiflo-mamuak, zure gorroto genetikoa agertu zaizu justu lanaren epilogoan.

Zuk bazenekien zure hooligan betikoek ez zizutela parkatuko horren artikulu heldua, odolik gabea. Horregatik amaitu duzu horrela: EAJ española delako. Ñ eta guztiz. Zaletu erdi-ero guztiak dituzu txaloka, tragoak hartzera gonbidatuko zaituzte berriro ere, gauez atera eta SEGIren kartelak jarriko dituzue, dianaren erdian "Traidoreak" idatzita eta alboetan betikoen aurpegiak agertzen dituztenak, euren artean gure alderdi-buru Josu Jon Imazena. Ez da harritzekoa, gero, zu bezalako maisuak dituzten umemokoak hildakoen hilobiak desegitera joatea Polloen. Agian euskararik irakasten ez duten eskoletan zu hartu beharko zintuzkete doktrina apur bat emateko. Orduan bai, orduan eraikiko genuke herri, Euskal Herri Handi eta Garaiezina. Lelo, lelo halako hori!