Ipar Euskal Herria: Konstituzioari BAI ala EZ?

Norbaitek aurpegiratuko dit ia amnesiak jota nagoen. Ez ba. Bada gure artean lurralde bat mugaz handik gurearen izen bera duena: Euskal Herria. Jazotzen da, ordea, Franziaren menpe dagoela eta, batik bat, frantsesa erabiltzen dutela elkar ulertzeko.

Egun hauetan, maiatzaren 29ko erreferendumaren karira, jo eta ke ari dira batzuk baietzaren alde, eta besteak ezetzaren alde. PNV eta UDF elkarrekin, BAI-aren alde agertu dira, berrogei pertsonaren aurrean, Angelun. "Mugak hausteko" dio Imazek; "ELkartasuna, Bakea eta Askatasuna" eskuratzeko gehitzen dio Gimenez Angeluko kontseilari nagusiak. "Ultraliberalek ez dute Konstituzio horren beharrik" Imazek. Azkenean, biak ala biak "Mort pour la Patrie" abestu dute frantsesez, ekitaldi guztia ere hizkuntza horretan izan baita.

Jarraitu

EZ-aren aldekoek ere berdin argudiatu dute "Erreferendum deitutako horrek (...) liberalismoa instituzionalizatzen baitu" dio Mirentxo Lako Ezezkoaren Aldeko Ekimeneko kideak, eta hizkuntza minorizatuak ezeztatzen dituela ere badioen moduan. Lako andreak, Imazek ez bezala, euskaraz landu du diskurtsoa.

Deigarriena, hala ere, PNV/UDF eskutik ikustea egin zait. Bagenekien Europako Alderdi Demokratikoan elkar topo egiten dutela, baina hortik ekitaldi bateratuak egitera badago aldea. Ez deritzot gaizki; izan ere, PNVk zerbait bilatu beharra dauka Ipar Euskal Herriko eta Nafarroako hutsuneak betetzeko. Zergatik ez du ekitaldi bateraturik egiten CDNrekin Nafarroan? Azkeneko hauek norbaiten bila ari dira bizirik jarraitu ahal izateko. Imagina ezazue: PNV/UDF/CDN koalizioa. Mugak hautsi behar badira, alderdi horien artekoak ere hautsi daitezke. Zergatik ez?