Hemen gaude

Igandean egunkaria eskuetan hartu eta ikaratu egin nintzen. Lehen orriaren erdialdean argazki erraldoia: ertzain bat lepoz, besoetan zeukan fusila nabarmentzen zitzaiola. Lizartzan ateratako argazkia zen. Bigarren eta hirugarren orrialdeetan ere berdin. Denetan ertzaina erasokor. Ui, ui, ui esan nion neura buruari. Zer da hau? Laugarren orriko txoko batean larunbat gauean Lekeition izandako kale borroka bortitzaren berri laburra zetorren. Ez zirudien, hurrean, horren importantea ertzainetzea erasotzea. Ertzaina helburu. Zarautzen ez zituzten bost kilo leherkari jarri hiltzeko asmoz. Hemen gaude esateko modu bat zen. Gaur Pernando Barrenak egin duenaren antzera: gu gabe eraiki nahi baduzue prozesu berria, ez da posible izango, gu ere Hemen Gaude!! Ba bai, posible izan daiteke Pernando!! Ez ahaztu: zeuok ere saiatu zineten PNV, EA, EB eta Aralar gabe hauteskundeen atarian. Zergatik ez orain zuek gabe?

ETAk ez du beste erremediorik izango erailtzea baino, berriro atentzio mediatiko etengabea berreskuratu gura badu. Hori patua, zerbait izateko erail egin behar. ENAMekoek zerbait usaindu dute, gustatu ez zaien zerbait. Lehenengo bider gera daitezke gatazkaren erabaki-gunetik kanpo. Hala da hori. Eta paradoxa ere bai; izan ere, Ibarretxek ez du gehiengorik izango Legebiltzarrean, ez bada EHAKren botoekin. Zer egingo dute Ibarretxeren proposamenaren aurrean? Kontra egin? Duela lau urte maisuki jokatu zuten abenduaren 30 hartan. Otegik Hitzaurrerari emandako hiru botoei ezker egin zuen aurrera Estatutu Politiko Berriak, Madrileko harresiarekin topo egin zuen arte. Jeltzaleek ez zuten hori espero, gehiago nahi zuten Batasuna erabat kontra agertzea, horrekin hauteskundeetara joan ahal izateko, plebiszitu bila.

Ostiralean EAEko Legebiltzarraren aurrean azalduko dira Batasunakoak, PNVren eta PSEren iruzurra salatzeko asmoz, nahiz ez dakiten Ibarretxek zein proposamen egingo duen. Berdin zaie: iruzurra da!! Eta lurraldetasunaren eta kontsultaren aldeko apostua egiten badu? Berdin izango da. Eurak ez badaude, planteiamendurik muturrekoena ere iruzurra izango da. Eurek bakarrik eman diezaiokete zilegitasuna Euskal Herriko ezein proiekturi. Baztertzen badituzte, gerra. Aintzat hartzen ez badituzte, leherkariak. Edo eurak, edo inor ez. "Hemen gaude, eta ez ahaztu gutaz" diote ozenki entzun nahi dien guztien aurrean.

Bien bitartean, abisuak Lekeition, Durangon, Zarautzen, ... Nonahi eta ahal dutenero.